Давкова денеска до Собранието треба да го достави предлогот за нов гувернер на Народна банка
До крајот на денешниот ден, претседателката Гордана Сиљановска-Давкова треба да го достави предлогот за нов гувернер на Народната банка на Република Македонија до Собранието. Како што е најавено, пратениците утре ќе одлучуваат на пленарна седница за новиот прв човек на централната банка.
Мандатот на досегашната гувернерка, Анита Ангеловска-Бежоска, истекува на 21 мај, откако беше назначена на функцијата во мај 2018 година. Таа е петтата личност што ја извршувала оваа должност, по Димитар Богов, Петар Гошев, Љубе Трпески и Борко Станоевски.
Претседателката Сиљановска-Давкова минатата недела изјави дека се разгледуваат неколку имиња:
Премиерот Христијан Мицкоски претходно истакна дека Владата и ВМРО-ДПМНЕ очекуваат избор на „вонсериски искусен кандидат“ кој ќе го гарантира одржувањето на макроекономската стабилност. Како клучен услов за поддршка на кандидатурата, тој го посочи цврстото залагање за фиксниот курс на денарот.
Мицкоски додаде дека комуникацијата со претседателката на оваа тема е во тек и дека изборот ќе се одвива во предвидениот рок:
Гувернерот на Народната банка има клучна улога во спроведувањето на монетарната политика, надзорот на банкарскиот систем и обезбедувањето финансиска стабилност. Според член 48 од Законот за Народна банка, гувернерот:
-Ја претставува институцијата и е одговорен за спроведување на одлуките на Советот,
-Контролира управување и работење на банката,
-Може да склучува договори, набавува стоки и услуги во име на Народната банка,
-Формира работни и советодавни тела и може да делегира овластувања.
Гувернерот редовно го известува Советот за состојбата во финансискиот систем и на девизниот пазар, вклучувајќи ризици со потенцијално значајно влијание.
Очекувања
Иако имињата на кандидатите сè уште не се обелоденети, јавноста и пазарите очекуваат стабилност и професионален континуитет. Изборот на нов гувернер се случува во момент кога монетарната политика игра клучна улога во справувањето со глобалните економски предизвици и одржувањето на довербата во домашната валута и банкарскиот систем.
