Да се подобри професионалната поддршка за мајките кои работат
Кога
таткото заработува и е затрупан со работни обврски тогаш е херој кој се грижи
за семејството, а често истото е обратно за мајката која наидува на осуди дека
е себична ако работи.
Мајката не треба да заборави на кариерните
амбиции, смета Данче Азманова Мирчевска, Основачка на платформата WorkingMom со
која разговаравме за подршката која им е неопходна на младите мајки кога прават
кариера пауза поради породилно отсуство и продолжувањето на професионалниот
пат.
„И во 21 век за жал сведоци сме дека фокусот е
ставен на традиционалното општествено уверување дека мажот е оној кој по
основање семејство треба да се фокусира на правењето пари, а жената освен што
би имала некоја просечна или обична работа треба исклучиво да се фокусира на
одгледувањето на децата, но за среќа многу современи мајки го менуваат токму
овој застарен наратив“, вели таа.
Финансиската
слобода не е невозможна мисија. Правото на работа и заработка не може никој да
го ограничи. Професионалниот пат по бременоста може полесно да се изоди.
„Еве неколку корисни практики што мене лично
ми помогнаа да стекнам финансиска слобода:
●
Водете ваш личен буџет каде што секој ден ќе ги
евидентирате сите приходи и расходи.
●
Имајте фонд што се вели за „црни
денови“ што ќе покрива 3 до 6 месеци од вашите лични трошоци.
●
Инвестирајте во фондови со добра
камата.
И секако, ако финансиите не ви се силна
страна, побарајте помош од стручно лице како финансиски советник или брокер“,
вели Азманова.
Личните
искуства на мајките кои работат се одличен ресурс за споделување совети и
искуства дека не се сами.
„Навистина е важно да тргнеме од себе и да го
вреднуваме нашето знаење и вештини. Затоа што ако не се вреднуваме себеси, она
што го работиме, она за што сме се едуцирале и сме учеле долги години, ќе ни
биде навистина тешко да го наплатиме нашиот личен труд бидеќи ќе ни биде
незгодно да побараме цена за која што можеби сметаме дека е превисока. Затоа, разговарајте со луѓето што го живеат
финансиското изобилство што вие го посакувате, читајте за нив и гледајте што прават.
А, потоа размислете како да ги воведете нивните навики во своето секојдневие. И
не заборавајте дека сиромашните луѓе имаат големи телевизори. Богатите луѓе
имаат голема домашна библиотека“, заклучува Азманова.
Х.С.
