„Да се напушти вештачкото надувување на капиталните инвестиции“: еве што велат економистите за изборните ветувања на партиите
Нереално високо проектирање на економскиот раст ги надувува фискалните приходи и го потценува буџетскиот дефицит. Предвидената фискална консолидација е коректна, но неопходна е да биде сеопфатна, односно која нема да се гледа само низ призма на буџетскиот дефицит. Неопходно е да се напушти вештачкото надувување на капиталните инвестиции и тие да се буџетираат реалистично и низ среднорочна буџетска рамка.
Ова се дел од забелешките на Институтот за економски истражувања и политики „Фајненс тинк“, кои в последниот коментар ги анализираа изборните програми на политичките партии од перспектива на ризици.
– Сега е важно прудентно управување со јавниот долг, со оглед дека земјата оперира на психолошката граница од мастришкиот критериум за јавен долг во однос на БДП од 60%
Ветувањата за повисоки плати може да бараат високи субвенционирања од буџетот, според поуките од минатото. Ваков тип субвенции се фискален хазард.
Раст на пензиите повисок од предвиденото усогласување со растот на цените и платите е сериозен фискален хазард – укажуваат од „Фајненс тинк“.
Според нив, фискална консолидација е неопходна и на приходната страна, но на краток рок примарно и единствено преку истрајна борба со сивата економија, а не со повисоки и нови даноци. Исто така укажуваат оти е неопходна рационализација и преиспитување на ефектите од сите видови државна помош, кои кријат ‘сиви зони’ за неефикасно трошење народни пари. Целосната анализа на овој линк.
