Д-р Чибишев алармира: Децата не смеат да имаат активности надвор во денови со екстремно загадување
Доктор Андон Чибишев, преку објава на социјалните мрежи алармираше за ризиците по здравјето на децата во услови на екстремно загаден воздух.
Тој информира дека денеска предпладне, поминувајќи по улицата „Илинденска“, кај бензинската пумпа на „Макпетрол“, забележал голем број деца на возраст од околу 7 до 10 години како трчаат и тренираат на фудбалско игралиште.
Според Чибишев, ваквата активност е особено загрижувачка имајќи предвид дека загадувањето на воздухот во моментот е на исклучително високо ниво. Тој посочува дека при физички напор дишењето станува поинтензивно, што значи и поголемо внесување на штетни и отровни гасови од амбиенталниот воздух.
– Не знам чија е идејата на ваков ден, кога загадувањето е екстремно, децата да трчаат и да се изложуваат на физички напор. Во такви услови труењето со присутните отровни гасови може да биде многу посериозно – наведува докторот.
Тој смета дека организаторите требало да покажат поголема одговорност и да ги одложат тренинзите или натпреварите, со цел да се заштити здравјето на најмладите.
Апелот на д-р Чибишев доаѓа во период кога Скопје повторно се соочува со високо аерозагадување, а лекарите континуирано предупредуваат на зголемени ризици, особено кај децата, хронично болните и постарите лица.
