ЦУК: Гори фабриката „Винчини“, пожарот е сериозен, се бара помош од Штип и Македонска Каменица

Центарот за управување со кризи (ЦУК) вечерва излезе со детали за големиот пожар во Виница, потврдувајќи дека огнената стихија зафатила повеќе магацини и производствени погони во фабриката за кондиторски производи „Винчини“, дел од компанијата „Макпрогрес“.

Според директорот на ЦУК, Мухамед Али, пријавата за пожарот била добиена преку бројот за итни случаи Е-112 во 18:40 часот. Веднаш било утврдено дека горат производствените погони со броевите 6, 7 и 8, како и магацински простории, што предизвикало брза реакција на Територијалната противпожарна единица од Виница.

Поради сериозноста на пожарот, ЦУК му дал насока на градоначалникот на Виница да побара итна помош од соседните општини. На терен, покрај виничките, веќе дејствуваат и сите расположливи капацитети на противпожарните единици од Кочани, вклучително и доброволното друштво.

Дополнителна поддршка во механизација и човечки ресурси е побарана и од општините Штип и Македонска Каменица, а ЦУК најавува дека доколку биде потребно, ќе се ангажираат сили и од други градови.

Од Центарот за управување со кризи нагласуваат дека станува збор за специфичен урбан пожар, поради што во справувањето со него мора да бидат ангажирани исклучиво професионални пожарникари.