Црногорците бараат да се укине Тик Ток – децата треба да живеат детски животи, а не да бидат „популарни“
Во Црна Гора е покрената петиција за укинување на Тик Ток.
Формуларот за електронски потпис е објавен и на веб-страницата на Собранието. Во текстот на петицијата се вели дека оваа платформа има исклучително лошо влијание врз децата и младите, затоа што покажува несоодветна содржина на огромен број луѓе.
„Истата содржина е креирана од нашите најмлади, со надеж дека ќе стане популарна, што е една од погрешните вредности што се промовира на оваа платформа – популарноста. Децата треба да живеат детски животи, да имаат детство, да уживаат во секој ден на нивните животи, а не да бидат `популарни` и да имаат модели кои не можат ништо да ги научат“, се наведува во петицијата.
Петицијата е покрената по серијата инциденти поради мониторингот на Тик Ток, а особено откако 13-годишен ученик од основното училиште „Владислав Рибникар“ во Белград месецов уби девет свои соученици. Во регионот имаше бран насилства. Млади, но и возрасни се закануваа дека ќе извршат масакри.
