ЦРНИ ПРОГНОЗИ ОД ШВАЈЦАРИЈА: Светската трговија на колена поради царините на Трамп
Светската трговска организација (СТО) прогнозира дека глобалната трговија ќе се намали оваа година поради царините наметнати од американскиот претседател Доналд Трамп.
Во анализата се додава дека „сериозните негативни ризици“, вклучувајќи реципрочни царини и политичка несигурност, може дополнително да ја влошат ситуацијата во глобалната трговија.
„Се очекува падот да биде особено изразен во Северна Америка“, соопшти СТО, предвидувајќи пад на трговијата за повеќе од 10 отсто во регионот, пренесе Би-Би-Си.
Генералниот директор на СТО, Нгози Оконџо Ивеала, рече дека „раздвојувањето“ меѓу САД и Кина е „вистински загрижувачки феномен“.
СТО претходно најави дека глобалната трговија со стоки ќе се зголеми за 2,7 отсто оваа година, но сега предвидува пад од 0,2 отсто.
„Нашите симулации покажуваат дека неизвесноста во трговската политика има значително негативно влијание врз трговските текови, намалувајќи го извозот и слабеењето на економската активност“, рече главниот економист на СТО, Ралф Оса.
Слична прогноза денеска даде и Конференцијата на ОН за трговија и развој (УНКТАД), која предвидува забавување на глобалниот раст оваа година на 2,3 отсто, поради зголемените трговски тензии и неизвесноста.
Во извештајот се наведува дека проекцијата сега е под „прагот од 2,5 отсто, што се смета за сигнал за глобална рецесија“.
Основната царина од 10 отсто за речиси целиот увоз во САД почна да се применува на 5 април, додека царината за речиси сите производи од Кина изнесува дури 145 отсто.
Американската берза беше во минус на отворањето денеска и сите главни индекси паднаа поради тековната неизвесност.
И покрај прогнозите за пад на глобалната трговија, СТО очекува дека некои региони, пред се Азија и Европа, сепак ќе забележат раст.
Извештајот на СТО за прв пат предвидува тренд во трговијата со услуги, како што се туризмот или финансиите, каде што стоките не се физички разменуваат, туку се обезбедуваат услуги.
Годинава се предвидува раст на трговијата со услуги за четири отсто, што е за околу еден процент помалку од очекуваното.
