Цивилното население во Појасот Газа и хуманитарните организации – чекаат привремен прекин на огнот
Цивилното население на Појасот Газа и хуманитарните организации во регионот чекаат привремен прекин на огнот во јужниот дел на Газа. Според некои новински агенции, се очекува да биде отворен граничниот премин Рафах со Египет, од каде ќе може да се достави хуманитарна помош.
„Египет подготви значителна помош за жителите на Газа. Точката Рафа ќе биде отворена. Заедно со ОН, Израел и другите учесници го подготвуваме механизмот со кој ќе се добива помошта“, најави Ентони Блинкен, државен секретар на САД.
Се чини дека во тек се подготовки, барем во еден правец, за да проработи „Рафа“. Оваа бескрајна линија камиони е на египетската страна, натоварена со храна, вода и друга помош. Египет рече дека помошта не оди за оние на кои им е потребна, бидејќи Израел не соработува со нив. Но, дури и да влезат камионите, се чини дека нема надеж дека цивилите собрани пред портите ќе можат да избегаат од Газа.
„Дојдовме на контролниот пункт, надевајќи се дека барем тука ќе биде безбедно. Но, дури и ја гранатираа улицата Рафа. Не знам што да правам. Дојдовме иако знаеме дека нема да отворат, но тука не е безбедно Осум дена бевме без струја, без вода. Ова не е живот“, рече Хадел, жител на Газа.
Наспроти ова, израелските воени единици продолжуваат да се распоредуваат долж границата со Појасот Газа во очекување на голема копнена офанзива. Интензивните воздушни напади минатата недела уништија цели области на палестинската енклава, но не успеаја да го спречат Хамас да истрела ракети кон Израел.
