Циципас го победи Мареј во пет сета, за четири часа и 40 минути во два дена!

За тоа му беа потребни пет сета, четири часа и 40 минути игра, распоредени во два дена. Мечот кој почна синоќа во 21 часот (20 по британско време) ги заинтригира тениските фанови уште тогаш, бидејќи 36-годишниот Мареј направи пресврт. Откако го загуби првиот сет со 7-3 во тајбрејк, возврати со иста мера во вториот, со 7-2, а потоа брејк уште во првиот гејм беше доволен за да го освои и третиот период од мечот (6-4).

Мораше да биде прекинат бидејќи дојде близу 23 часот по локално време, а теоретски тоа требаше да му биде од корист на Мареј, затоа што се соочуваше со грч на ногата. Одморен и охрабрен од поддршката денеска влезе во продолжението со намера да му се реваншира на Гркот за поразот во нивното единствено досегашно соочување на грен-слем, УС-опен 2021 (3-2 за Циципас), меѓутоа не успеа да надвладее.

Во четвртиот сет ниту еден тенисер не успеа да дојде ни до брејк-топка, камо ли реализација, а само два загубени сервиса на Британецот во тајбрејкот донесоа разврска. Петтиот беше решен во третиот гејм, кога Мареј сервираше лошо. Ова беше втора победа на Циципас во третото соочување со Мареј. Во третото коло од Вимблдон ќе игра против Србинот Ласло Ѓере.