Чудотворната моќ на манастирот „Света Ана“ во село Маловиште

Длабоко во буковата шума на Националниот парк Пелистер, на надморска височина од 1.400 метри, се крие едно од најспокојните и најсветите места во Македонија – манастирот Света Ана, пишува Читај.бе

Како што велат, сместен на само два километри од живописното село Маловиште, ова светилиште е вистинско прибежиште за сите што бараат мир, духовно прочистување и чудотворна надеж.

Црквата посветена на мајката на Пресвета Богородица постои со векови, со записи што датираат уште од 18 век. Денешниот храм е подигнат во 1936 година, а манастирските конаци се надградувани низ целиот дваесетти век. Но, вистинската вредност на ова место не е само во каменот и иконите – туку во духовната енергија што ја носи.

Секоја година на 7 август, за празникот Успение на Света Ана, манастирот станува собиралиште за стотици верници од Битола, Ресен и цела Македонија. Луѓе доаѓаат да се помолат, да запалат свеќа, да се поклонат пред иконата на Света Ана – но и да најдат тишина, сенка и свежина под старите буки на Пелистер.

Особено трогателна е традицијата на брачните парови кои доаѓаат тука со надеж дека ќе добијат пород. Веќе со децении се прераскажуваат сведоштва за чудотворната сила на ова место. Верувањето вели дека паровите кои ќе преспијат во манастирот ноќта меѓу 6 и 7 август, ќе бидат благословени со дете. Многумина велат – Света Ана ги слуша тивките молитви на срцето.

Во близина на манастирот се наоѓа и извор со лековита вода, што извира од коренот на стара бука – извор што мештаните го сметаат за света вода од памтивек.