Четвртина од Македонците сметаат дека никогаш нема да влеземе во ЕУ, а 68% од младите во регионот се на „излезна врата“
Еден од секои четворица граѓани на Македонија (25%) верува дека вратите на Европската Унија ќе останат засекогаш затворени за земјата. Ова го покажуваат резултатите од најновото истражување „Балкански барометар 2025“ на Советот за регионална соработка (РЦЦ), кое открива длабок јаз помеѓу скептицизмот за датумот на влез и вербата во економските придобивки од Унијата.
Додека политичките елити лицитираат со години, граѓаните се поделени во своите прогнози. Според истражувањето, 21 отсто очекуваат влез во ЕУ до 2035 година, 11 отсто до 2040 година, додека најголеми оптимисти се 15 отсто од испитаниците кои веруваат дека членството ќе се случи до 2030 година.
И покрај разочарувањето од долгиот процес на интеграција, македонските граѓани не се откажуваат од идејата за ЕУ, првенствено поради економијата.
Високи 62 отсто од граѓаните сметаат дека членството ќе донесе економски бенефит за државата. Само 9 отсто мислат дека тоа би било лошо, додека 27 отсто имаат неутрален став.
На ниво на Западен Балкан, поддршката за ЕУ бележи раст и изнесува 64 отсто (за разлика од 54% во 2024 година).
Можеби најзагрижувачкиот податок од истражувањето се однесува на иднината на регионот. Во целиот Западен Балкан, дури 68 отсто од младите се подготвени да заминат во странство.
За споредба, кај општата популација, желбата за останување во татковината е поголема (59%).
Во 2025 година, главниот непријател на граѓаните е паричникот.
Кога станува збор за регионалната соработка, како главни кочници се посочуваат недовербата поради историските прашања (38%) и националистичката политика (37%).
