Четворица повредени во пожарот во Трубарево
Вкупно четири лица се повредени во големата огнена стихија што 15 часа беснееше во рециклаторниот центар на „Ф-Групација“ во скопско Трубарево, соопшти денеска на прес-конференција владината портпаролка Марија Митева. Огнот, кој избувна вчера околу 13:30 часот, утринава е ставен под целосна контрола.
Според владините информации, пожарот избувнал во штала која била наменета за складирање на отпадна електрична и електронска опрема, вклучително и отпадни батерии и акумулатори. Огнот брзо се проширил на неколку околни објекти, предизвикувајќи густ црн чад што го вознемири целиот скопски регион. Повеќе детали за состојбата на повредените ќе соопшти министерот за здравство Азир Алиу на прес-конференција закажана за 13 часот.
Директорот на Дирекцијата за заштита и спасување (ДЗС), Стојанче Ангелов, потврди дека со големи напори е спречено ширењето на пожарот кон погоните каде што била складирана отпадна пластика, со што е избегната уште поголема катастрофа.
Во меѓувреме, истрагата за причините и последиците е во полн ек. Јавното обвинителство соопшти дека уште вчера ја ангажирало Единицата за атомска, биолошка и хемиска одбрана на Армијата, која извршила мерења за токсична контаминација на воздухот. Првичните резултати се доставени до обвинителот, а се чекаат и наодите од Министерството за животна средина.
Обвинителството издава наредби за обезбедување на целокупната документација на компанијата „Ф-Групација“, но нагласува дека во опожарениот објект сè уште нема безбедносни услови за вршење увид на лице место. Локацијата останува под обезбедување на полицијата.
