Чебрен ќе се гради со британски пари
Хидроелектраната Чебрен конечно добива зелено светло – и тоа со финансиска поддршка од Обединетото Кралство. На денешната надзорна расправа за аерозагадувањето во Собранието, премиерот Христијан Мицкоски објави дека изградбата на стратешките проекти Чебрен и Галиште ќе се реализира со средства од британски заем, во вредност од 1,2 до 1,3 милијарди евра.
„Единствено за кое преговараме од стратешки аспект се изградбата на хидроелектраните Чебрен и Галиште. Силно сум убеден дека ни се потребни, не само од аспект на производство на електрична енергија, туку и како водни ресурси со оглед на климатските промени,“ рече премиерот.
Според Мицкоски, новите акумулации ќе имаат повеќекратна корист: ќе обезбедат дополнителна количина вода за Тиквешко поле, ќе ја зајакнат организираната мрежа за наводнување и ќе помогнат да се спречат загуби во земјоделското производство. Премиерот потенцираше дека овие водни ресурси ќе покриваат околу 55-60 илјади хектари земјоделско земјиште од прва класа, што директно ќе влијае на продуктивноста на овоштарите и земјоделците.
Покрај економскиот и енергетскиот бенефит, Мицкоски посочи и на туристичкиот потенцијал на акумулациите во Мариово. Приватни инвеститори веќе покажуваат интерес за развој на туристички капацитети во регионот, што дополнително ќе ја зајакне локалната економија.
„Ова е стратешки проект кој нема да заврши во мандатот на оваа влада, туку ќе се реализира во текот на следните неколку децении. Но, вредноста што ќе ја донесе за државата е огромна,“ нагласи Мицкоски.
Средствата за проектот ќе бидат обезбедени преку поволни државни заеми, а дел ќе се финансира преку пазарни механизми и приватни инвестиции.
Мицкоски, во контекст на влијанието врз здравјето, истакна дека подобрата животна средина ќе значи и намалена потреба од здравствени услуги. Буџетот на Фондот за здравство, според него, е најголем досега – 53 милијарди денари, што е зголемување од 300 милиони во споредба со претходните буџети.
Со изградбата на Чебрен и Галиште, Северна Македонија прави сериозен чекор напред во енергетската независност, еколошката стабилност и руралниот развој.
