Чави разочаран од своите фудбалери: Играме срамно!
Загуби од Реал на домашен терен со 1-2, потоа едвај го победи Сосиедад со гол во судиското продолжение, а вечерва доживеа пораз од Шахтер во четвртото коло од Лигата на шампионите. Разочарувањата на „каталонците“ во елитното европско натпреварување последните години не се новост, но односот и пристапот исклучително го нервираат тренерот Чави.
„Се наоѓаме во лош момент, што се однесува до играта и резултатите. Се мачиме кога ја имаме топката и сакаме да нападнеме. Ова беше еден од нашите најлоши натпревари последните години. Срамота е како играме, но мораме да продолжиме“, изјави Чави.
Иако ја освои титулата во Ла Лига минатата сезона, шпанскиот стручњак нема добар скор во Лигата на шампионите. На вкупно 12 натпревари како тренер на Барселона, има само пет победи со пет порази и два нерешени резултата. Изговор за денешниот пораз може да му биде тоа што неколку фудбалери неодамна се вратија од долги паузи поради повреди и се уште не се во посакуваната форма.
