ЦЕНИТЕ НА АКЦИИТЕ РАСТАТ! МБИ-10 со нов рекорд по пауза од 12 години

Вредноста на МБИ-10 за една година е зголемена за 66%, a oва само по себе кажува каква била годината што изминува на Македонската берза за хартии од вредност

Македонскиот берзански индекс МБИ-10 вчера го забележа својот нов историски максимум и го затвори тргувањето со вредност од 10.089 индексни поени. Со тргувањето вчера МБИ-10 го урна својот досегашен рекорд што беше достигнат на 30 август далечната 2007 година кога за прв пат беше пробиена психолошката граница од 10.000 поени, а вредност на МБИ-10 достигна 10.058 индексни поени.

Вчера, по пауза од 12 години, 3 месеци и 20 дена барометарот на Македонската берза МБИ-10 постави нов рекорд.

Како што веќе пишувавме, новата рекордна вредност беше очекувана со оглед на тоа што особено во последнава година најтргуваните акции на нашата берза покажаа конзистентност во континуираниот раст на пазарните цени. Се тоа е збир на објективни, но и субјективни пазарни околности. За кои досега сме пишувале во неколку наврати.

Наједноставно кажано тригодишниот тренд на конкурентност на дивидендните приноси со каматните стапки, ликвидноста во тргувањето на најбараните македонски акции и доследната и беспрекорна дивидендна историја на тие акции направи да бидат барана стока на македонскиот пазар на капитал.

Тука вреди да се напомене и тоа дека релативно ограничената понуда на квалитетни домашни акции односно нивната концентрација во МБИ-10 беше и дополнителен катализатор за растот на пазарните цени на најбараните македонски акции.

Само за отсликување на тоа каква беше оваа година за најдобрите десет акции на Македонската берза е доволно да кажеме дека вредноста на МБИ-10 за една година се зголеми за повеќе од 4.000 индексни поени. Едноставно кажано вредноста на МБИ -10 за една година порасна за порасна за 66%

Растот е енормен во однос на периодот во кој е реализиран.

Што е МБИ-10 кои се клучните македонски акции?

Македонскиот берзански индекс кој преку пондерација преку пазарна капитализација овозможува објективно прикажување на движењата на цените на Македонската берза. Индексот го сочинуваат 10 акции кои се тргуваат на Официјалниот пазар поради што и ја има наставката 10 во својот наслов.

МБИ-10 го сочинуваат акциите на: Комерцијална банка, Алкалоид, Макпетрол, Гранит, Стопанска банка Скопје, ТТК Банка, НЛБ Банка, Македонски телеком, Македонијатурист и од пред некој ден акцијата на Реплек.

Македонската берза два пати годишно прави ревизија на вредноста на индексот. Ревизијата се прави на шест месеци односно првата е во јуни, а втората на средината на декември.

Најголемо влијание во структурата на индексот имаат Комерцијална банка и Алкалоид кои воедно се и најликвидни т.е. најтргувани акции на нашата берза. Тие две придонесуваат со по 20 отсто во вредноста на МБИ-10. Следни две највлијателни акции за пресметка на вредноста на МБИ-10 се Макпетрол чија акција придонесува со 16,49 отсто во вредноста на индексот и НЛБ Банка која контрибуира со 15,38 отсто. И тука завршува бројот на акции со двоцифрен придонес во МБИ-10. Скопски „Гранит“ уествува со 8,79 отсто, а Стопанска банка Скопје со 5,29 отсто. Акацијата на „Реплек“ придонесува со 4,89 отсто, а Македонски Телеком со 3,93 отсто. Со 2,89 отсто во МБИ-10 учествува ТТК Банка со 2,89 отсто, а „Македонијатурист“ со 2,34 отсто.

Повеќе детали за индексот има на следниот линк 

Н.С.