Цената на водата може да се зголеми за 30 денари, Бислимовски вели дека го одбиле предлогот на Водовод за многу повисока цена

Со предлогот на Регулаторна комисија водата за граѓаните би се зголемила најмногу до 30 денари на месечно ниво.

Ова го соопшти претседателот на Регулаторната комисија Марко Бислимовски кој рече дека се одбиени предлозите на Водовод Скопје за поскапување на водата бидејќи барале повисока цена поради зголемување на трошоци од електрична енергија и до Регулаторна навеле дека наместо субвенционираната од 95 евра користат струја од отворен пазар односно цена на берзата Хупекс.

Регулаторна комисија предлага минимално и максимално покачување за кое Водовод ќе треба да донесе одлука, по што ќе треба да го достави до Советот на Град Скопје.

„Постојната цена за домаќинствата изнесува 31,87 денари. Со нашата одлука минималната тарифа предлагаме да изнесува 31,53 денари, значи тоа е одредено минимално намалување кое што се должи на фактот што помошта која што ќе се дава со пониска цена на електрична енергија ќе продолжи и во следниот период, додека максималната тарифа изнесува 34,82 денари. Месечниот трошок ако се прифати максималната тарифа би значел зголемување од 29,5 денари на месечно ниво“, вели Марко Бислимовски.