ЦЕМЕНТАРНИЦА УСЈЕ ПОЧНУВА СО ИСПЛАТАТА – ќе се дели дивиденда, еве што треба да направат акционерите за да си ги земат парите
Важна вест стигна за акционерите на Цементарницата УСЈЕ, доколку сакаат да си ги земат парите кои им следуваат како дел од добивката што лани ја оствари компанијата, односно својата дивиденда.
УСЈЕ Титан за оваа информација ги извести акционерите преку Македонската берза.
„Ве известуваме дека согласно Одлуката за распределба на
добивката остварена по Годишната сметка и Финансиските извештаи за 2022 година,
донесена на Годишното Собрание на акционери на ден 16.05.2023 година,
Цементарница УСЈЕ АД Скопје ќе започне со исплата на дивиденда.
Во согласност со чл. 32 ст. 2 од Законот за хартии со
вредност, пресметката и исплатата на дивиденда ќе се врши од страна на
Централниот депозитар за хартии од вредностАД Скопје
(ЦДХВ).
Се повикуваат акционерите на Цементарница УСЈЕ АД Скопје
со право на дивиденда, кои немаат доставено податоци за платежни сметки, да го
пополнат Образецот кој можат да го преземат на следните линкови
https://www.cdhv.mk/ControlPanel/Upload/Obrazeczaisplatanadividenda.pdf
(за домашни акционери) https://www.cdhv.mk/ControlPanel/Upload/Dividend%20Payment%20Form.pdf
(за странски акционери)
и најдоцна до 29.06.2023
година да го достават до писарницата, или по пошта на следната адреса: Централен депозитар за хартии
од вредност АД Скопје, Бул. „Кузман Јосифовски Питу бр.1,
П.Фах. 274, 1000 Скопје, Република Северна
Македонија.
Компанијата лани, како што е познато, оствари добивка од 16,74 милиони евра, што, за волја на вистината, е за 13 отсто пониска во споредба со профитот кој успеа да го реализира во 2021 година, на износ од 19,15 милиони евра. Но, мора да се има предвид дека овој профит од близу 17 милиони евра за УСЈЕ е одличен резултат, ако се има предвид дека 2022 година беше кризна година, со огромни цени на енергенсите и висока инфлација, како и намалување на јавните градежни инвестиции порадуи руско-украинскиот конфликт, што ја намали и продажбата на компанијата. Сепак, оттаму во своите извештаи објаснуваат дека успеале да ја задржат профитабилноста, што всушност го покажува и солидната добивка.
Ако се има предвид дека доминантен акционер на УСЈЕ е Титан Цемент Холандија, кој поседува дури 95 отсто од акциите на нашата цементарница, или прецизно 535.596 акции, тоа значи дека овој странски акционер годинава ќе „ќари“ во форма на дивиденда одлична сума од 11,1 милиони евра. Практично, толку добива странскиот акционер од работењето во нашата држава.
Но, да видиме каде ќе завршат оние 5 отсто од дивидендата што ќе се дели, или сума од 580 илјади евра, кои нема да му припаднат на Титан Цемент.
Имено, акционери на УСЈЕ се и 238 македонски граѓани, односно домашни физички лица, кои располагаат со 26.638 акции, или 4,72 отсто од акционерскиот капитал на компанијата. Однодно, овие 238 домашни акционери ќе земат вкупно 551 илјади евра.
Има и 4 домашни фирми, или правни лица, кои се акционери на УСЈ, и поседуваат 1.530 акции, кои ќе им донесат 32 илјади евра вкупно.
Н.Н.Ф.
