Бурата Киеран ја погоди јужна Англија: Стотици училишта затворени, железничките услуги суспендирани

Бурата Киеран ги погоди Британските острови придружена со силен дожд, а јужна Англија ја зафатија ветрови со брзина од 160 километри на час, кои претходно во текот на ноќта ги погодија Франција и Ла Манш.

Издадени се жолти, портокалови и црвени временски предупредувања, што укажува на потенцијален ризик по животот и имотот.

Стотици училишта ширум јужна Англија беа затворени поради невремето и силниот дожд, а железничките услуги беа прекинати, додека на возачите на југот и западот на Велика Британија им беше препорачано да ги избегнуваат крајбрежните патишта, јави Би-Би-Си.

Жолта метеоролошка тревога е во сила за делови од Англија, Шкотска и Велс. Во бурата Бабет пред две недели, која ја погоди Велика Британија, загинаа најмалку седум лица, а илјадници куќи беа погодени од поплави.

Француските медиуми јавија дека невремето го погодило западниот брег на Франција со брзина до 178 километри на час во западна Бретања.

Повеќе од 1,2 милиони Французи останаа без струја

Невремето остави 1,2 милиони домови без струја во Франција, од кои 780.000 се во Бретања, соопшти францускиот дистрибутер на електрична енергија, пренесе Франс 24.

Метеоролозите најавија дека невремето во текот на денот ќе се пресели во внатрешноста, а во сила е портокалов метео аларм за вкупно 31 француски департман.

Во некои области долж Атлантикот се очекуваат бранови од осум до 10 метри, а во Париз на сила е предупредување за силен ветер.

Во Франција се очекува да биде во прекин сообраќајот од неколку аеродроми низ земјата, како и од железничките линии до петок наутро.
Невремето ќе зафати и повеќе земји во Западна Европа, меѓу кои и Велика Британија и Холандија.