Бунт во Министерството за финансии, нема зголемување на платите
Бурен ден имало денеска во Министерството за финансии, откако министерот Фатмир Бесими ја повлекол одредбата за зголемување на платите на вработените за 30 отсто од 1 јануари 2023.
Зголемување на платите нема да има, одлуката е одложена, а дел од вработените денеска околу 13.00 часот излегоа на протест и потоа се повлекоа.
Неофицијално имало разговор помеѓу раководителите и Бесими, но инфо за средбата засега нема. Според соопштението од министерството што го издаде подоцна, може да се заклучи дека зголемувањето се одлога затоа што не може да се направи систематизација.
Во него се вели дека треба да се допрецизира дали одредбата е во согласност со Законот за буџет. Министерот за финансии истакнува дека во оваа насока со амандман на новиот системски Закон за буџети, предложен и поддржан од страна на пратениците во Парламентот, интенцијата беше решавање на прашањето во насока на обезбедување соодветни и фер услови согласно одговорноста.
„Но, бидејќи со оваа одредба на Законот не може, да се постигне самата цел на Законот, односно наградување на сите тие што се вклучени во подготовката и спроведувањето на државниот буџет, поради неможноста на утврдување на специфичноста на работните задачи и посебната одговорност која произлегува од работната позиција, примената ќе ја регулираме со допрецизирање на одредбата од Законот за Буџети или со самиот Закон за систем на плати во јавниот секторот, кој е во завршна фаза на подготовка како системско решение ва рамки на јавниот сектор“, се вели во дел од соопштението.
Вработените во МФ сметаат дека не може со одредба да се суспендуира законско право и дека во минатото се доделувале додатоци на плати поради специфичноста на работното место. За УПОЗ е кривично дело суспендирањето на веќе потпишаните решенија. Од УПОЗ стравуваат дека може и да доцнат платите.
