Бугарите изненадени од изјавите на Дачиќ, бараат заштита за нивното малцинство во Србија
Софија се лути на српскиот министер за надворешни работи, Ивица Дачиќ затоа што не им го признава малцинството.
Софија ги нарече изненадувачки и крајно несоодветни „изјавите со кои, заради остварување на домашни политички цели, се фрла сомнеж на постоењето на Бугари во Србија и на потребата да се заштитат нивните права“. Според нив, имало 120.000 Бугари кои се сведени на 20.000.
„Ова го навредува достоинството на нашите сонародници во соседната држава и никако не придонесува за развој на добрососедските односи со Бугарија“, порача бугарското Министерство за надворешни работи.
Велат дека „разликата меѓу уставниот систем на Србија и другите земји, вклучително и Бугарија, не можат да се користат како аргумент за можно одбивање на српската држава да ја исполни својата заложба за гарантирање на правата и слободите на претставниците на националните малцинства, вклучително и на Бугарите“.
„Бугарија не ги признава националните малцинства, но наспроти тоа, многу протестира за лоша состојба на Бугарите во Србија. Е, ова е веќе навистина… Но, кога ние им кажуваме, а што со Србите во Бугарија, тогаш тие одговараат: во Бугарија нема Срби. Тоа значи ако и ние кажеме дека нема Бугари во Србија, тогаш нема да има проблеми ни со бугарското национално малцинство“, изјави деновиве Дачиќ.
БГНЕС пишува и дека во јануари 2020 година, коментирајќи ги односите со Црна Гора, Дачиќ прашал за какви внатрешни работи денес се зборува во Европската Унија, кога во Србија има Бугари кои се само 0,26 отсто од нивното население, но Бугарија на секој состанок на Европскиот совет го поставува прашањето за правата на бугарското национално малцинство. Инаку, Бугарија бара права за бугарското малцинство во Македонија, но не признава македонско малцинство. Дури европратеникот Ангел Џамбаски имаше снимено видео пред споменикот на Скендербег во Приштина и кажа дека таму имало многу Бугари.
