Бројот на електрични возила и plug-in хибриди продадени во Европа надмина 3 милиони

Во текот на минатата година на европскиот пазар се продадени повеќе од три милиони електрични автомобили (вклучувајќи ги и plug-in хибридите), што претставува зголемување од 16 проценти во однос на претходната година, додека уделот на целиот автомобилски пазар се искачи на речиси 25 проценти. Од трите милиони продадени возила, 1,84 милиони се исклучиво електрични автомобили, што зазема 16 отсто од пазарот, додека бројот на продадени plug-in хибриди достигна 1,17 милиони, што претставува осум отсто од пазарот. Од 20-те најпродавани возила во оваа категорија, само четири модели се plug-in хибриди, додека останатите се електрични модели.

Се разбира, Tesla може да се пофали со најпродаваните електрични автомобили на Стариот континент. Нејзините автомобили ги зазедоа првите две места на листата – Model Y беше продаден во повеќе од 255 илјади единици, додека продажбата на Model 3 надмина 100 илјади. Трет најпродаван електричен автомобил на европскиот пазар, според податоците објавени на страницата Inside Evs, е ID.4 на Volkswagen со 83.000 продадени примероци, а по него е Škoda Enyaq iV, кој е продаден нешто помалку од 80.000 примероци.

Што се однесува до декември, таму ситуацијата е многу полоша. Во последниот месец од минатата година се продадени помалку од 300 илјади електрични возила и плаг-ин хибриди, што е голем пад во однос на декември 2022 година, кога беа продадени речиси 415 илјади. Причината за тоа не е наглото намалување на побарувачката за овој тип на автомобили (падот на продажбата на е-возила е 25 проценти, а на plug-in хибридите дури 36 проценти), туку дека во некои земји, како што е Германија, стимулациите а субвенциите за електрични возила важеа до крајот на 2022 година, па многумина побрзаа и го искористија поттикот. Со продадени 25.000 примероци, моделот Y на Tesla го предводеше пазарот и во декември, а на второто место, очекувано, се најде Model 3 со продадени 13.152 модели. Изненадувањето е на третото место каде со нешто повеќе од 9 илјади продадени автомобили се наоѓа кинескиот модел MG 4.

Оваа година би требало да биде доста интересна на европскиот пазар на електрични автомобили. Може да се очекува дека Tesla ќе ги задржи првите две позиции, иако разликата помеѓу Model 3 и конкуренцијата е се помала и помала, а тоа возило може да биде загрозено од модели како ID.4 и Enyaq iV, а ние секако треба се спомене и зголемената популарност на кинеските компании кои освен на домашниот пазар, имаат големи амбиции и надвор од границите на Кина.

Исто така, ќе биде интересно да се види колку ќе порасне побарувачката за електрични возила, бидејќи во последно време се повеќе се сигнализира дека интересот за овој тип возила, барем во Европа, се намалува.

Фото: Принтскрин/Твитер