Брера ќе монтира специјална трибина за Комити за дуелот со Вардар!
Струмичани не само што ќе им посакаат добредојде на навивачите од Скопје, туку ќе монтираат специјална трибини за нив, на комплексот „Горан Пандев“.
„Го известуваме членството дека управата на ФК Брера во консултација со нашата управа, а поради малиот капацитет на спортскиот комплекс ‘Горан Пандев’, одлучи пред натпреварот во недела, да биде монтирана посебна трибина наменета за Вардаровите навивачи. Трибината е наменета за бројка од 100 луѓе, но покрај самата трибина ќе биде обезбеден и дополнителен простор за групата и за симпатизерите на клубот“, соопштија Комити преку социјалните мрежи.
Ова ќе биде прв вардаров меч во најсилната македонска лига, по испаѓањето во 2021 година и по две сезони одиграни во Втора лига, па оттука и се очекува одзив на овој апел и поддршка на гостувањето во Струмица.
