Братот на Сашо Мијалков го мерка пазарот на електрична енергија
Владимир Мијалков, братот на поранешниот шеф на тајната полиција Сашо Мијалков и братучед на поранешниот премиер Никола Груевски, го зголемува својот интерес за бизнисот со електрична енергија според активностите и промените кои се забележани на Централниот регистар во изминатиот период.
Од средината на овој месец поранешниот советник на раководството на Царинската управа станал сопственик на компанијата „Перманент Сан ИТ“ на местото на извесна Даниела Нешовска. Фирмата е основана во октомври минатата година со дејност – производство на електрична енергија и со седиште во Кисела Вода. Мијалков од пред десетина дена е и управител на ова друштво, кое засега нема лиценца за учество на пазарот на електрична енергија.
За разлика од „Перманент Сан ИТ“, која е новорегистрирано друштво, забележана е и промена на сопствеништво кај две поодамнешни фирми поврзани со Владимир Мијалков и истовремено за производство и трговија со електрична енергија.
Станува збор за „Косвинд“ и „Космак Винд Енерџи“, и двете од Скопје, Претходно медиумски беше објавено дека двете фирми датираат уште од 2011 и дека се раководени од блиско лице на братот на Сашо Мијалков. Од пред помалку од две недели, нов сопственик на овие две фирми, наместо „Инвалл Мак“ е „Адцрем“, компанија регистрирана во септември лани и со седиште во Карпош.
Владимир Мијалков беше советник на директорот на Царинската управа до 2018, кога си даде оставка на негово барање. За разлика од неговиот брат, Владимир беше во сенка на големите бизнис активности што ги преземаше Сашо Мијалков.
Семејството Мијалкови се поврзува со милионски бизниси со нафта, градежништво, обезбедување, хотели, недвижности, но во јавноста нема познати потфати на полето на електричната енергија.
Помладиот Мијалков како дипломиран економист добар дел од својот работен век го поминал во Царината каде што почнал да работи уште во 1999 година. Две години беше директор во Национална платежна картичка, фирма во која во управниот одбор едно време беше поголем дел од раководството на ВМРО-ДПМНЕ.
А.К.
