Братот на Џоко Ѓоргиев започна кампања за споменик во чест на Џоко Ѓоргиев и загинатите во трагедијата во „Пулс“
Братот на трагично загинатиот тапанар на групата „ДНК“, Џоко Ѓоргиев, започна хуманитарна кампања за собирање средства за подигнување на споменик во чест на својот брат и на сите жртви од најголемата трагедија во поновата македонска историја – пожарот во дискотеката „Пулс“ во Струмица.
На платформата „Павел Андреев“, Димитар Ѓоргиев објави повик за донации со цел собирање на 30 илјади евра за спомен-обележје кое ќе биде поставено на плоштадот во родниот град на Џоко. Иницијативата доби јавна поддршка и од градоначалникот на Струмица, Костадин Костадинов, кој не само што ја сподели акцијата, туку и лично се појавува меѓу донаторите.
Според информации изработката на споменикот ќе биде доверена на познатиот сликар и вајар Митко Тошев, кој воедно е и професор по ликовна уметност во гимназијата „Јане Сандански“. Локацијата на споменикот на градскиот плоштад е веќе во фаза на планирање, а адаптацијата на урбанистичкиот план ќе потрае околу две недели. Времетраењето на самата изработка засега не е прецизирано.
Во текстот на иницијативата е наведено дека поставувањето на овој споменик претставува „споменик на вечниот препород“ – обележје што ќе ги чува сеќавањата на 63 младешки животи, згаснати во една кобна вечер.
Џоко Ѓоргиев, кој загина на само 24 години, остана запаметен како млад музичар со исклучителен талент и огромно срце. Свирејќи тапани на настап со својата група, тој животот го заврши таму каде што најмногу припаѓаше – на сцената. Симболично, иницијативата порачува дека „огнот можеби го зеде неговото тело, но не и љубовта, музиката и спомените што ги остави зад себе“.
„Да не дозволиме неговото име да се заборави. Да се обединиме како негови пријатели, сограѓани и луѓе кои веруваат во музиката и човечноста. Тој свиреше до самиот крај – да направиме неговиот удар на тапанот никогаш да не згасне,“ стои во апелот за поддршка.
Секој кој сака да даде свој придонес во изградбата на ова трајно спомен-обележје, може да донира преку платформата „Павел Андреев“.
