Брат со метален предмет го усмртил својот брат, па го закопал во дворот – откриено убиство во Кавадарци
Полициската станица во Кавадарци поднесе кривична пријава против 43-годишниот С.И. од Кавадарци, кој се сомничи дека на 27 јули 2025 година го усмртил својот брат И.И. (42), а потоа го закопал во помошен објект во дворот од нивната заедничка куќа. Случајот се води како кривично дело „убиство“ по член 123 од Кривичниот законик.
Според информациите од полицијата, осомничениот со метален предмет му нанел смртоносни повреди на братот, по што телото го сокрил закопувајќи го во дворот. Убиството било откриено откако нивната сестра В.О. (44) на 5 август го пријавила И.И. како исчезнат во 11:00 часот, а само два часа подоцна, во 13:00 часот, повторно се јавила во полиција со сомнеж дека нејзиниот брат можеби е закопан во дворот, откако со сопругот забележале свеж ископ во помошниот објект.
По пријавата, веднаш реагирале јавен обвинител, полициски службеници и експерти од Институтот за судска медицина, а по наредба на обвинител бил повикан и екипа од погребално претпријатие која ја откопала дупката. Телото на И.И. било пронајдено и однесено на обдукција.
Истото попладне, околу 14:40 часот, С.И. бил приведен. По извршени проверки и добиени сознанија, во координација со јавен обвинител, тој бил спроведен во обвинителството каде во службен разговор го признал делото.
