Браќата Стојановски спречија изненадување во Аеродром, Пелистер се помачи со Феникс!

Гевгеличани почнаа храбро, покажаа заби и по првото полувреме дури и водеа со десет поени разлика (49-39). Но, тоа како да ги налути аеродромци, пред се браќата Војдан и Дамјан Стојановски, кои беа главни во фантастичното второ полувреме на шампионот, кое беше добиено со 44-20. Пресвртот беше направен уште во третиот период и тоа со серија 18-2 со која „металците“ дојдоа дури и до опиплива предност (57-51), која до крајот само ја зголемија. Домашните по само 15 минути останаа без тренерот Драган Николиќ и центарот Абдул-Малик Абу, првиот поради влегување во терен среде меч, при што се судри со Мајрон Гордон, а вториот поради напуштање клупа.

Братскиот тандем Стојановски доминираше на двете страни на теренот, што се гледа и од фактпт што заедно постигнаа скоро две третини од поените на МЗТ, а и двајцата беа на чекор до дабл-дабл ефект. Војдан беше најефикасен со 29 поени и седум скока, додека Дамјан ја заврши средбата со 21 поен и девет скока. Гордон со 21 поен беше најпрецизен кај гостите.

До водство во серијата дојде и Пелистер, кој исто така потешко од очекувањата го совлада Феникс (90-86). Вторите средби од сериите се играат в среда или в четврток.