Божиновска: Ќе побараме помош од домашни банки за грејната сезона
Министерката за енергетика Сања Божиновска на денешната прес-конференција како одговор на новинарско прашање рече дека ќе бидат потребни финансиски средства за справување со грејната сезона, бидејќи ЕСМ поради лошата состојба со РЕК Битола во континуитет од септември мара да набавува поголеми количини на електрична енергија.
– Следните седум дена ќе правиме точен енергетски биланс и се надеваме дека ќе ги имаме точните бројки за потребна електрична енергија. Сето тоа зависи и од хидрологијата. Во моментов акумулациите се полни само со 24 отсто што воопшто не е во ред, меѓутоа може да се наполнат акумулациите ако ноември е дождлив. Што се однесува за финансии – со премиерот имаме дискутирано и тука, иако не е финализирано, имаме добри шанси да набавиме финансиски средства. Се уште немаме разговарано како, но ќе бидат домашните банки, рече Божиновска.
Министерката наведе и дека истовремено треба да се враќа голем долг кон ЕВН, но не прецизираше дали тој е направен од страна на ЕСМ или пак од неплатени фактури од јавните институции кои се снабдуваат со електрична енергија.
– Изминатите три години не е платен ниту денар на име субвенционирана струја. Тоа што го гледавме на сметките дека владата го покрива како трошок на граѓаните не е платено. Сметката стигна сега. 60 милиони евра е долгот во однос на ова што го имаме.
Разговаравме со ЕВН за долгот. Тие се свесни за состојбата на нашиот буџет Кажаа дека ова не е нешто што треба да се врати за една или две години и дека се спремни да дискутираме. Знаат дека тоа ќе биде долгорочно, додаде Божиновска.
