Босански министер: БиХ ќе биде членка на НАТО, нема многу да се прашуваат политичари со негативна реторика
Босанските власти сакаат државата да влезе во НАТО, но лидерот на босанските Срби, Милорад Додик е против.
Министерот за одбрана на Босна и Херцеговина (БиХ), Зукан Хелез оцени дека неговата земја сигурно ќе стане членка на НАТО, а дека политичарите од Република Српска кои не го сакаат овој процес нема да успеат да го блокираат. Тој за сараевско Ослобоџење кажа дека во НАТО постои цврста одлука дека БиХ треба да стане членка.
„Луѓето од НАТО се спремни да помогнат БиХ што побрзо да се прими во Алијансата. Нема многу да се прашуваат овие политичари кои влечат на страна, кои имаат негативна реторика. Тие можат само да зборуваат, а ние ја работиме својата работа и БиХ ќе биде членка на НАТО“, кажа Хелез.
Објасни дека за првпат по повеќе години во буџетот за 2023 година е предвидено зголемување на трошоците за војската во износ од околу 45 милиони евра.
На зголемувањето на трошоците за одбрана остро се противеа политичарите од Република Српска, а претседателот на тој ентитет Милорад Додик е најгласен противник на секое приближување на БиХ на членство во НАТО.
Додик инсистира дека БиХ мора да остане воено неутрална. Тој изјави дека РС ќе стане независна држава, бидејќи Босна и Херцеговина не може да биде дел од регионалните иницијативи, како што е „Отворен Балкан“.
Додик рече дека „Отворен Балкан“ е добра иницијатива, но дека Босна и Херцеговина не мисли така. Има најави дека и Црна Гора може да се приклучи на иницијативата. Финска деновиве стана 31-та членка на НАТО. Оваа одлука ја налути Русија.
foto EPA
