Борел на средба со лидерите на Западен Балкан во вторник во Њујорк
Шефот на европската дипломатија Џузепе Борељ на 19 септември во Њујорк ќе се сретне со лидерите на Западен Балкан.
Тие ќе разговараат на традиционална средба на маргините на 78. сесија на Генералното собрание на ОН, соопшти Европската служба за надворешни работи.
Предвидено е Борељ да го посети Њујорк, каде што ќе престојува до 22 септември, за да учествува на повеќе мултилатерални настани на високо ниво, како и билатерални средби во рамки на 78. сесија на Генералното собрание на ОН.
Борељ, заедно со претседателот на Европскиот совет, Шарл Мишел, денеска треба да ја претстави Европската унија на трилатерален состанок со Африканската унија и ОН, а потоа ќе се сретне и со генералниот секретар на ОН Антонио Гутереш.
Европската унија соопшти дека утре, 18 септември, Борељ ќе копретседава и со состанок посветен на мировниот процес на Блискиот Исток, заедно со претставници на Саудиска Арабија, Лигата на арапските држави, Египет и Јордан.
Истиот ден, високиот претставник Борељ ќе претседава со неформалниот состанок на министрите за надворешни работи на ЕУ, а потоа ќе присуствува и на состанокот на министрите за надворешни работи на Г7.
Исто така, шефот на европската дипломатија, заедно со претседателот на Европскиот совет, Шарл Мишел и претседателката на Европската комисија, Урсула фон дер Лајен, ќе присуствуваат на отворањето на генералната дебата на 19 септември, а потоа ќе се сретне со лидерите на Западен Балкан на традиционална средба на маргините на Генералното собрание.
Во среда, 20 септември, Борељ ќе копретседава со 13-от министерски состанок на Глобалниот форум за борба против тероризмот, чиј домаќин се Европската Унија и Египет. Тој попладне ќе учествува на министерскиот состанок на Ад-хок Комитетот за врски за Палестина, чиј домаќин е Норвешка.
Во четврток, на 21 септември, Борељ ќе присуствува на вечерата на министрите за надворешни работи на трансатлантските земји, чиј домаќин ќе биде американскиот државен секретар Ентони Блинкен.
