Боки 13 бара средба со обвинителот Абази: Ќе ви доставам бомби за настани поврзани со корупција и криминал
Шоуменот Бојан Јовановски – Боки 13 кој е осуден на девет години затвор за случајот „Рекет“, бара средба со јавниот обвинител Ислам Абази, со цел да поднесе кривични пријави, и како што најави, да му достави бомби поврзани со криминал и корупција.
„Во име на високиот степен на јавниот интерес, Ви соопштуваме дека Бојан Јовановски иницираше постапка пред јавниот обвинител Ислам Абази, шеф на ОЈО за ГОКК Скопје. На ден 16.02.2023 година Бојан Јовановски во писмена форма, своерачно потпишана од негова страна, тој побара да биде изведен во најкус можен рок, исклучиво пред обвинителот Ислам Абази и во присуство на полномошниците м-р адвокат Владимир Туфегџиќ, адвокат од Скопје и Сашо Дуковски адвокат од Скопје, поради тоа што истакнува дека единствено има доверба во посочениот јавен обвинител.“, соопштија од адвокатскиот тим на Јовановски.
„Бојан Јовановски во писмото до јавниот обвинител истакна барање за поднесување на кривини пријави на записник кои се однесуваат на лица и настани поврзани со коруптивни, казниви дела и криминални дејствија на лица од највисоките државни структури од сферата на политиката, правосудството, бизнис елитата и други лица кои биле во заедничка корелација на сторување.
Со наведеното ја информираме јавноста дека започнува исклучително сериозен и сензитивен процес, дотолку повеќе што Бојан Јовановски при поднесувањето на кривичните пријави на записник ќе ги предаде сите докази во поткрепа на пријавите , а доказите кои ги поседува се во форма на снимени разговори, транскрипти, пораки, фотографски и видео записи ( т.н. “бомби” ) како што е и наведено и во самото барање до јавниот обвинител од страна на Бојан Јовановски.
Ја известуваме јавноста дека благовремено преку јавните гласила ќе бидат споделувани информации за отпочнатиот процес и ја повикуваме јавноста со внимание да го следи процесот, особено важно поради статусот и положбата на подносителот Бојан Јовановски, за кој апелираме дека после започнување на овој процес ќе биде изложен на интензивирана тортура, притисоци и закани, па оттука повикуваме на разумност и поддршка од општата и стручната јавност.
Во прилог на соопштението Ви ја доставуваме содржината од барањето и примерок од барањето кон јавниот обвинител со приемен печат од ОКОЈ за ГОКК.“, стои во соопштението.
