Блумберг: Трамп ќе депортира мигранти во Србија
Администрацијата на американскиот претседател Доналд Трамп побарала од Србија и неколку други балкански земји да примат мигранти кои ќе бидат депортирани од САД, објави агенцијата Блумберг, повикувајќи се на извори запознаени со темата.
Барањето е дел од пошироката стратегија на Вашингтон за идентификување странски влади кои би прифатиле дел од стотиците илјади мигранти чии привремени правни статуси беа укинати со неодамнешната одлука на Врховниот суд на САД. Станува збор за лица од Венецуела, Куба, Хаити и Никарагва.
Иако Блумберг не прецизира кои други балкански земји се вклучени, се наведува дека Србија е особено интересна за администрацијата на Трамп, поради планот за изградба на облакодер во Белград од страна на инвестициска компанија кооснована од Џаред Кушнер, зетот на Трамп.
Српското Министерство за надворешни работи, како и Белата куќа и Стејт департментот, засега не ги коментираат овие информации.
Во април, Волстрит журнал објави дека САД ја разгледуваат опцијата за испраќање на депортирани мигранти и во Косово и Молдавија, како и на други локации ширум светот.
