„Блек Фрајдеј“ во „Гранит“! Кој директор си купи акции за 130.000 евра?
Генералниот директор Милковски преку вложувањето на 130.000 евра во акции на фирмата што ја води прати сигнал до инвеститорската заедница дека „Гранит“ е здрава, силна компанија која е најсериозен кандидат за учество во најголемата градежна експанзија на оваа петолетка наречена „коридор 8“
Важна официјална вест ќе го стимулира тргувањето со акцијата на најголемата македонска градежна компанија „Гранит“. Нејзиниот генерален директор Зоран Милковски си докупи над 6.100 акции со право на глас во „Гранит“ – компанијата што ја води. Во „Гранит“ Милковски помладиот веќе наследи 8,8 отсто од акциите од неговиот татко Страшо кој дваесетина години успешно го водеше овој градежен гигант специјализиран за нискоградба.
Според пазарната цена на акцијата на „Гранит“ Зоран Милковски вложил барем 130.000 евра во тие 6.137 акции. Со нивниот докуп Зоран Милковски ќе поседува 9,1 отсто од сите акции со право на глас што е за 0,25 отсто повеќе од неговата сестра Ивана која исто така акциите што ги поседува ги наследи од својот татко.
Оваа информација би требало позитивно да влијае врз тргувањето со акцијата на „Гранит“. Од причина што може да се толкува како веројатност за добивање на дел од бизнисот со изградбата на коридорот 8 кој длабоко ја подели македонската јавност.
„Гранит“ според својата пазарна позиција, бекграунд , знаење и исуство во делот на нискоградбата е компанијата што се наметнува како најсериозен домашен, па и локален партнер на конзорциумот “Бектел и Енка“ кој од нашата држава без тендер доби договор за изградба на автопати кои вредат 1,3 милијарди долари.
Освен братот и сестрата Милковски во „Гранит“ голем акционер е и српска компанија за градба со назив „Бард Коп“ ДОО Белград која поседува над 5 отсто од акциите.
Во сопствен откуп „Гранит“ уште од порано стерилизираше 10 отсто од акциите кои се наменети за одбрана од обид за непријателско превземање на оваа голема градежна компанија.
Р.Ф.
