Бизнисменот Назиф Дестани излегол од „Еуромакс Рисорсес“
Тетовскиот бизнисмен Назиф Дестани и сопственик на фирмата „Еколог“ го продал уделот во „Еуромакс Рисорсес“ („Еуромакс“), компанија која подолг период турка проект за отворање на рудник на бакар и злато кај месноста Иловица во струмичко.
Порталот Дома објави дека две години откако преку холандска фирма вложи 3 милиони долари во „Еуромакс Рисорсес“, Дестани ги продаде акциите за 3,2 милиони долари и се повлече.
„Назиф Дестани се повлече – но Иван Вутов преку кипарска фирма дојде да му прави друштво на татко му Цоло Вутов кој преку фирма од Кајмански Острови веќе поседува 51% од уделите во Еуромакс Ресурси. Крајниот ефект е тоа што фамилијата Вутови од Бугарија сега заедно поседуваат 66% од Еуромакс.
Но ова не е само бизнис-зделка – ова беше обид да се протне отровен проект на грбот на народот! Токму кога Дестани стана акционер, судовите одеднаш решија во корист на „Еуромакс“. Совпаѓање? Не мислиме така.
Се сомневавме тогаш, и денес добиваме потврда – проектот за рудникот не се туркаше само со пари, туку и со врски, политички интереси и задкулисни договори. Дестани сега си заминува а Цоло Вутов зајакнува, но ние остануваме да се бориме“, објави еко-организацијата Здрава котлина.
Од таму се сомневаат дека со бизнисмени блиски до рудникот Бучим се подготвува нов обид за експлоатација на рудникот за бакар и злато.
