Битка за четири општини: Утре стартува кампањата, Невзат Бејта трча по трет мандат во Гостивар

Од утре официјално стартува изборната кампања за повторените избори за градоначалник во општините Гостивар, Врапчиште, Маврово-Ростуше и Центар Жупа. Политичката трка ќе трае до 9 јануари на полноќ, по што следува изборен молк, а граѓаните ќе гласаат на 11 јануари.

Во изборниот ринг влегуваат вкупно 5 партии и коалиции, како и еден независен кандидат.

Најголемо внимание привлекува битката за Гостивар, каде што искусниот политичар Невзат Бејта се враќа на сцената. Со поддршка од коалицијата „Вреди“, тој ќе се обиде да го освои својот трет градоначалнички мандат. Негов директен противкандидат е Ваљбон Лимани од Националната алијанса за интеграција (НАИ).

Неизвесна трка се очекува и во Врапчиште, каде што силите ќе ги одмерат тројца кандидати:

Исен Шабани – кандидат на НАИ;

Зули Демири – кандидат на Алијансата за Албанците;

Зулхајрат Демири – кандидат на коалицијата „Вреди“.

Според заклучениот Избирачки список, право на глас во овие четири општини имаат нешто повеќе од 128.000 граѓани.

Поради специфичноста на теренот и миграцијата, Државната изборна комисија направи одредени корекции во распоредот на гласањето. Во вкупно 7 избирачки места во Гостивар и 5 во Маврово-Ростуше има регистрирано помалку од 10 избирачи. Тие своето избирачко право ќе можат да го остварат во најблиските избирачки места.