БИТИЌИ ОБВИНИ ДЕКА ЗАЕМОТ ОД УНГАРИЈА Е ЕКОНОМСКО ПРЕДАВСТВО: Петрушевски му одговори дека СДСМ го изгубил правецот

Според пратеникот од СДСМ, Фатмир Битиќи, задолжувањето од Унгарија е економско предавство, удар врз домашните компании. 

„Овој заем е удар за домашните компании, нивно исфрлање од економската орбита на оваа Влада. Ова е удар врз трудот на македонските бизниси, економско предавство на татковината“, рече Битиќи.

Тој вели дека заемите, како овој, кои доаѓаат од ЕКСИМ банки, независно дали тоа е од Унгарија или од друга земја, наметнуваат и услов, парите да се користат за фирми кои доаѓаат од матичната земја.

Но, пратеникот од ВМРО-ДПМНЕ, Бране Петрушевски вели дека СДСМ го загубил правецот. 

Петрушевски вели дека е срамно еден поранешен вицепремиер за економски прашања да излегува на говорница и да го критикува ова задолжување имајќи предвид дека во времето кога Битиќи бил вицепремиер тогашната влада го удвоила јавниот долг од 4,7 милијарди евра на 8,9 милијарди евра

Собранието со 65 гласа „за“ го  изгласа Законот за задолжување на Македонија со заем од половина милијарда евра од унгарската Влада, по скратена постапка.