Бислимовски: Парното поскапе зошто треба да се враќа позајмицата од Владата
Марко Бислимовски, претседателот на Регулаторната комисија за енергетика, денеска изјави дека парното за скопјани поскапува за 4,51 отсто затоа што треба да се врати дел од позајмицата на Владата дадена за ЕСМ во висина од 6 милиони евра за справување со енергетската криза и снабдувањето со топлинска енергија.
– Зголемувањето на цената се должи на тоа што цената за природниот гас, иако во меѓувреме се намали за 50 отсто, и натаму е висока, како и поради тоа што треба да се врати позајмицата на Владата дадена во јануари. Таа нема да се враќа одеднаш, туку ќе се враќа во наредните години и затоа нема многу високо зголемување, рече Бислимовски како одговор на новинарско прашање.
Тој додаде дека до крајот на годината нема да има корекции на цената по најавите во Бугарија дека се зголемува таксата за рускиот гас. На последниот тендер за набавка на природен гас за топланите на ЕСм, понудените цени биле вообичаени за референтната холандска берза.
Според Бислимовски, на зголемувањето на цената не влијаело ниту бројот од 480-те вработени во компаниите на ЕСМ за производство, дистрибуција и снабдување на топлинска енергија. За споредба, во претходниот оператор БЕГ бројот на вработени бил 315.
А.К.
