Бислимовски: Нафтените деривати ќе поскапуваат, дизелот вонредно за 2,5 денари повисока цена

Претседателот на Регулаторната комисија за енергетика, Марко Бислимовски, денеска во утринската емисија на МТВ рече дека вонредно за утре се зголемува за 2,5 денари цената на дизелот и екстра лесното гориво како резултат на шокот од иранско-израелскиот конфликт.

– Ова е прва недела, сега ќе биде првиот удар, денеска носиме вонредна одлука, дизелот и екстра лесното гориво ќе поскапуваат за 2,5 денари, рече Бислимовски.

Првиот регулатор изјави дека конфликтот освен што влијае на цената на суровата нафта, овој пат делува и на цената на природниот гас.

– Цената на природниот гас е за 20 проценти повисока минатата недела, а тоа најмногу ме загрижува, затоа што со тоа е поврзана цената на електрична енергија. Има нагорни придвижувања и на фјучерсите за третиот и четвртиот квартал во 2025, а кај фјучерсите за струја има зголемување з аоколу 3,5 посто што засега не е некоја голема промена, коментира претседателот на РКЕ.

Бислимовски рече дека од 2022 државата со законски измени има систематски механизам со кој се намалува акцизата ако има раст на цената на горивата.

– По она што го гледам, нафтата ќе оди меѓу 90 и 100 долари и тоа ќе предизвика пораст и на крајните цени на нафтените деривати, не само во Македонија, туку и во останатите земји, кажа тој.

Бислимовски потсети дека пред три години со руско-украинскиот конфликт цената на  мало на бензинот достигнала 110 денари по литар, а краткорочно позитивно е тоа што курсот на доларот во однос на денарот е намален.