Бислимоски: Зголемувањето на цената на струјата не можеше да се избегне
Првиот човек на Регулаторната комисија за енергетика (РКЕ), Марко Бислимоски, во гостувањето во емисијата „360 степени“ на МРТ 1, порача дека последната корекција на цената на електричната енергија била неопходна за да се спаси државната компанија ЕСМ од натамошно финансиско тонење.
Бислимоски појасни дека ситуацијата во Електрани на Северна Македонија е критична, бидејќи компанијата со години работи со загуби кои се покриваа само преку буџетски трансфери.
„За ЕСМ дали да опстои или да не опстои, ние немаме сценарио Б. Тоа е стожерна компанија која мора да застане на здрави нозе и полека да почне финансиски да закрепнува“, изјави Бислимоски.
За да не биде поскапувањето за граѓаните подрастично, Регулаторната комисија направила корекции во делот на мрежарините (пренос и дистрибуција), каде што има надлежност.
Во однос на незадоволството на универзалниот снабдувач „ЕВН Хоум“, кој бараше повисоко зголемување на цената, Бислимоски вели дека очекува тужба пред Управниот суд.
„Универзалниот снабдувач е обврзан да ја примени нашата одлука. Сметам дека ‘ЕВН Хоум’ ќе ја обжали, како што беше случај и претходно, но досега РКЕ редовно ги добивала тие спорови пред судот“, дециден е претседателот на РКЕ.
