Бежовска: Нашинците лани испратија 2,4 милијарди евра и го покрија трговскиот дефицит
Гувернерката на Народна банка, Анита Ангеловска-Бежоска, за време на посетата на Универзитетот „Гоце Делчев“ ‒ Штип, одржа предавање пред студентите на Економскиот факултет на кое што рече дека лани земјата добила прилив од странство во висина од 2,4 милијарди евра од нашинците.
Според гувернерката, тоа ќе помогне да се компензира за се подлабокиот трговски дефицит што го има Македонија со странство поради увозот на скапи енергенси, чија цена во последно време многу се зголеми.
„Движењата во надворешниот сектор се исклучително значајни за Народната банка со оглед на нашата монетарна стратегија на одржување стабилен девизен курс на денарот. Дефицитот на тековната сметка лани значително се прошири, главно како резултат на енергетската криза, односно увозот на енергенти по исклучително високи цени. Дел од овие притисоци беа ублажени преку високиот раст на дознаките од странство. Дознаките коишто беа значително погодени во периодот на пандемијата, во изминатиот период растеа со високи стапки на раст од 30 до 40 проценти, со што во 2022 година достигнаа 2,4 милијарди евра, што е историски највисоко ниво. На среден рок се очекува дека тие и натаму ќе растат, но значително поумерено со од годишен раст од 3 до 4 одсто“, рече гувернерката.
Трговскиот дефицит во 2023 се очекува да изнесува изнесува 3,6 проценти од БДП, но се очекува да се намалува со стабилизацијата на цените на основните производи и зголемувањето на побарувачката на наши производи од странство.
„Според најновиот циклус макроекономски проекции на Народната банка, годинава се очекува стеснување на дефицитот на тековната сметка, како резултат на подобрувањето на надворешното окружување преку намалување на притисоците од трговската размена, а пред сѐ кај енергентите. Финансиските приливи и понатаму би биле солидни и би го покривале дефицитот на тековната сметка, но истовремено ќе бидат доволни и за зголемување на девизните резерви. Сепак, неизвесноста опстојува и потребно е внимателно следење“, посочи Ангеловска-Бежоска.
