БЕСПЛАТЕН ОДМОР НА РОДОС ЗА СИТЕ КОИ ГО ПРЕКИНАА ПОРАДИ ПОЖАРИТЕ: Убавата вест ја соопшти премиерот Мицотакис
Туристите кои го
прекинаа својот годишен одмор на островот Родос поради пожарите ќе имаат
можност една недела бесплатно да се одмораат на есен или на пролет, најави грчкиот
премиер Кирјакос Мицотакис во интервју за британската телевизија ИТВ, јави
дописничката на МИА од Атина.
-За сите оние на кои им беше скратен одморот како резултат
на пожарите, грчката Влада во соработка со локалните власти ќе им понуди една
седмица бесплатен одмор на Родос, следната пролет или следната есен за да
бидеме сигурни дека ќе се вратат на островот и ќе уживаат во неговата природна
убавина, рече Мицотакис.
Истакна дека пожарите не се само проблем за Грција, туку за
целиот Медитеран, а конкретно за Родос рече дека „островот е целосно вратен во
нормала и не постојат активни пожари“.
Порача дека Грција е безбедна за туристите и апсолутно не
постои опасност, а ги повика сите оние кои оставиле во последен момент да
одлучат каде ќе го поминат одморот, да го изберат токму Родос.