Берзанското тргување со електрична енергија во Македонија од денес во евра
МЕМО, националниот оператор на пазарот со електрична енергија, соопшти дека од денес стартува тргувањето во евра на Македонската берза за струја, како еден од клучните аспекти за успешно интегрирање на македонскиот пазар на електрична енергија во единствениот европски пазар.
„До сега тргувањето на домашната берза на електрична енергија се реализираше во денари. Од денес за сите 37 компании кои тргуваат на пазарот ден однапред се воведува еврото како валута. На тој начин се отвора патот за пазарно спојување познато како маркет каплинг (market coupling) со берзите на соседните земји и членки на Европската унија, што е исто така приоритет на кој посветено се работи за следните две години, заедно со можноста за воведување на интрадневен пазар на електрична енергија“, истакна Зоран Ѓорѓиевски,директорот на МЕМО.
Инаку на берзата тргуваат компании како Енерџи Фајненсинг- ТИМ, ГЕН-И, Данске Комодитис,ЕВН Македонија, АД ЕСМ Скопје, Енерџи Актив, Рењувабал Енерџи Суплај РЕС, ТЕ-ТО АД Скопје, Дуферко МК ДОО и други.
Домашната берза на електрична енергија започна пред речиси две години во земјата, а организатор на пазарот „ден однапред“ е МЕМО.
