Бектеши: Владата не смее двојно да ги субвенционира компаниите со унгарскиот кредит
Поранешниот министер за економија, Крешник Бектеши, во денешната емисија „Вин Вин“ на Телма, рече дека државата не смее да им дели поволни кредити на компаниите и да ја субвенционира каматата од унгарскиот заем од 250 милиони евра, ако претходно некој од тие бизниси веќе добиле каква било форма на државна помош.
– Во Македонија е забрането двојното субвенционирање. Тоа треба да се пријави во Комисијата за заштита на конкуренцијата и да се провери. Ако каматата што деловните банки ќе им ја наметнат на компаниите што ќе аплицираат биде 5,25 отсто и при тоа државата од тоа субвенционира 2,25 отсто, тоа по мои пресметки би било 8 милиони евра пари годишно од државниот буџет. Ако кредитите се 15 годишни, за 15 години тоа би било 120 милиони евра, рече Бектеши.
Функционерот на ДУИ се сомнева дека стопанството има потреба од дури 250 милиони евра од унгарскиот кредит за модернизација и опремување, во ситуација, како што рече, кога домашните банки работат со голема ликвидност.
Коментирајќи го предлог Буџетот за 2025, рече дека има помалку пари за конзорциумот „Бехтел и Енка“ за изградба на четирите автопатски делници од законскиот договор.
„Има помалку пари предвидени за Коридорот 8 и Коридорот 10Д. Која е причината, треба да објаснат. Дали немаат доволно капацитетити за решавање на спорови и експропријација за да отворат терен ан Бехтел и Енка или слично“, наведе тој.
Бектеши додаде дека за три до четири пати се зголемени ставките во Буџетот за 2025 за купување службени возила, а за 7-8 пати за купување мебел.
„Договорните услуги се зголемени за над 13 отсто, парите се зголемени и за привремени вработувања. Што значи тоа? Дека сакаат да го одолговлечат Законот за еднаква етничка застапеност, за да ги направат тие вработувања по партиски клуч?“, прашува Бектеши.
