Бектеши: И Владата да ја ревидира одлуката, согласно законските прописи концесиите ќе мора пак да се спојат

Министерот за економија Крешник Бектеши објасни зошто е побарано и одобрено спојување на две концесии за експлоатација на бакар и злато од компанијата Еуромакс Ресоурцес ДОО Скопје, за рудникот Иловица. Вели дека Министерството за економија само го почитувало законот и насоките дадени од Управниот суд.

„Уште стопати да се повтори оваа ситуација, уште сто пати би одлучиле идентично“, изјави Бектеши.

Првата постапка почнала во 2005 година, а завршила со потпис на концесија од тогашниот министер Зоран Ставревски во 2012 година. Но, откако фирмата во 2016 година побарала дозвола за експлоатација што е финален чекор, Министерството за економија во 2019 во време на Бектеши како министер, ја одбиле фирмата со образложение дека документацијата е некомплетна, oбјави Радио Слободна Европа.

Иницијативата за втората концесија била отпочната во 2009 година, ги поминала исто така сите фази и позитивни мислења од Министерството за животна средина, за Транспорт и врски, Министерството за внатрешни работи, Министерството за култура, Министерството за земјоделство, Општините Босилево и Ново Село и одлуката за давање на концесија била потпишана од тогашниот премиер Никола Груевски во 2015 година. Кога повторно во Министерството за економија е побарана дозвола за експлоатација, во 2019 година е донесено решение дека документацијата е некомплетна. Во меѓувреме во два наврати фирмата побарала да се спојат двете концесии и тоа во 2018 и во 2019, но по предлогот за спојување немало одлуки. Токму тоа вели Бектеши дека е причина што сега во 2023, Управниот суд донел одлука дека мора да се одлучува по барањето за спојување на двете концесии.

фото Фејсбук/ Крешник Бектеши