Бебе починало на ГАК: Интерни документи укажуваат на сериозни пропусти
Новороденче со реални шанси за живот починало на 1 октомври годинава на интензивна нега на Клиниката за гинекологија и акушерство во Скопје, а на семејството смртта му била претставена како неизбежна.
Сепак, интерни документи до кои дојде „Слободен печат“ покажуваат дека началничката на интензивната нега, д-р Елизабета Петковска, пријавила педијатарка од одделот, наведувајќи дека несоодветно лекување и доцнење од околу 20 минути при реинтубација довеле до тешки компликации и смрт на бебето.
Според пријавата, при повеќекратните обиди за реинтубација биле повредени ларинксот и дишните патишта, по што настанале масивен пнеумоторакс и дестабилизација на новороденчето. Две специјализантки во изјави го потврдиле ваквиот тек на настаните. Во документите се наведува и дека во потврдата издадена на родителите биле внесени неточни податоци, без евиденција за компликациите и долготрајната реинтубација.
Иако пријавата е доставена до директорката на Клиниката уште на 13 октомври, институциите – Министерството за здравство, инспекторатот и Обвинителството – два месеца не биле известени. Клиниката тврди дека не се утврдени неправилности, додека семејството дури преку новинарите дознало за сомнежите за пропусти во лекувањето.
Читај повеќе на „Слободен печат“.
