Барањето за спојување на концесиите во Иловица повторно ќе се најде на владина седница, одлучи Вишиот управен суд
Веќе нема дилеми дека инвеститорот во рудникот за бакар во Иловица ја поседува концесијата за парцелата „Иловица 6“. Од компанијата Еуромакс Ресоурцес соопштија дека во нивна полза е најновата пресуда на Вишиот управен суд. На 24 ноември годинава, судот донел трета и финална пресуда по тужбата на инвеститорот за одлуката на Министерството за економија. Таа одлука датира од 2019-тата година и со неа беше одбиено барањето на Еуромакс за дозвола за експлоатација за „Иловица 6“. Освен што актуелната пресуда е во корист на компанијата, во неа се напоменува и дека Владата претходно морала да одлучи по барањето за спојување на концесиите „Иловица 6“ и „Иловица 11“. Без ваквата одлука, како што укажува судот, Министерството за економија немало основа да го поништи барањето за „Иловица 6“. Правната сага траеше пет години, а сега Вишиот управен суд дури и ја поништил одлуката на Министерството.
-Сите судски постапки иницирани од активностите на Владата во однос на концесијата „Иловица 6“ сега се решени во наша полза, Владата е должна да донесе одлука по нашето барање за спојување на концесиите „Иловица 6“ и Иловица 11“, согласно последната пресуда на Вишиот управен суд донесена на 24 ноември 2023 година. Вишиот управен суд донесе пресуда по тужбата на Еуромакс Ресоурцес по одлуката за одбивање од страна на Министерството за економија на нашето барање за дозвола за експлоатација за концесијата „Иловица 6“. Со оваа финална пресуда на Вишиот управен суд се уважува тужбата на компанијата и се поништува оспорената одлука на Министерството за економија, се наведува во соопштението на Еуромакс ресоурцес.
Според пресудата, носењето одлука за барањето за спојување на концесиите за „Иловица 6“ и „Иловица 11“ претставува претходно правно прашање на барањето за експлоатација што Министерството го одбило. Односно, не можело да се одбива таквото барање на инвеститорот од 2016 година, без да се има одговор од Владата за спојувањето. Владата пак до моментот кога Министерството ја носи спорната одлука, ова прашање воопшто не го поставила на дневен ред. Со најновата пресуда на Вишиот управен суд, се нагласува дека Владата е должна да одлучи за спојувањето на концесиите.
-Вишиот управен суд утврди дека Владата има обврска да донесе одлука за барањето за спојување на двете концесии, и исто така посочи дека Еуромакс ги има исполнето сите законски барања за тоа да биде позитивно одлучено. Ние веруваме дека сега Владата има целосен правен легитимитет за повторно да го стави одлучувањето по основ на барањето за спојување и при тоа повторно да одлучи во корист на Проектот, изјави главниот извршен директор на Еуромакс Ресоурцес, Тим Морган – Вин.
Според она што го додава директорот Морган, ако Владата дозволи спојување на двете концесии, компанијата најверојатно ќе се повлече од намерата за меѓународна арбитража, која државата може да ја чини и до една милијарда евра.
-Доколку Владата го одобри барањето за спојување на двете концесии и се продолжи во исполнување на сите законски обврски, ние забрзано ќе го интезивираме развојот на Проектот Иловица-Штука, испорачувајќи моќни економски користи, и истовремено дозволувајќи сенката од евентуална меѓународна арбитража целосно да исчезне, дополнува Морган – Вин.
Владата изминатово лето донесе одлука за спојување на концесиите, но после само еден месец, поточно на 25 јули, се повлече и ја поништи веќе усвоената одлука за спојување на концесиите „Иловица 6“ и „Иловица 11’“. Па така, одново настана статус-кво ситуација и практично Владата се уште нема донесено одлука за ова прашање, за кое настојува да се одлучи и од страна на Вишиот управен суд. Во основа на одлуката за спојување беше позитивното мислење од страна на Министерството за економија.
Поради ваквиот чекор назад кон остварување на инвестицијата, Еуромакс Ресоурцес повторно се реши да тужи, а постапката, како што соопштија, се уште е во тек.
-Дополнително сакаме уште да ја потсетиме јавноста, компанијата минатата недела испрати писмо до министерката за животна средина и просторно планирање, г-ѓата Каја Шукова обврзувајќи се дека при експлоатација на минералните суровини во идниот рударски комплекс „Иловица – Штука“, нема да се користи цијанид согласно Законот за минерални суровини; компанијата се заложува за технологија на „суво јаловиште“ при менаџирањето на отпадот од рудникот и се обврзува на изградба на нов водоводен систем за потребите на локалното население, се заклучува во соопштението на Еуромакс Ресоурцес.
