Автопатот Гостивар-Букојчани готов до 2029 година – експропријацијата речиси завршена
Градежните работи на автопатската делница Гостивар-Букојчани, која е клучен дел од Коридорот 8, се одвиваат со силно темпо. Според најавите од Владата, овој капитален инфраструктурен проект треба да биде целосно завршен до крајот на 2029 година.
При денешниот увид на терен, вицепремиерот и министер за транспорт и врски, Александар Николоски, изрази задоволство од динамиката на работите кои ги изведува американско-турскиот конзорциум „Бехтел и Енка“.
Еден од најголемите предизвици при изградбата на патишта во земјава – експропријацијата, за овој проект е речиси целосно надминат.
Министерот Николоски потенцираше дека ваквите големи проекти директно влијаат врз економијата и градежништвото.
Очекувањата се дека овој позитивен тренд ќе продолжи, а надлежните уверуваат дека нема да има никакви отстапувања од зацртаните рокови за финализирање на целиот проект.
