ATV возило оштетило скијачки патеки на Попова Шапка – случајот пријавен во полиција
Ски-центарот „Попова Шапка“ информира дека на скијачките патеки било регистрирано лице кое со ATV возило неовластено влегло на теренот и изведувало опасни маневри (дрифт), при што биле предизвикани оштетувања на патеките.
Од ски-центарот посочуваат дека ваквото однесување е неодговорно и строго забрането, а воедно претставува сериозен ризик за безбедноста на скијачите и посетителите.
Случајот ќе биде пријавен во полиција и кај надлежните институции за понатамошно постапување.
Од таму потсетуваат дека на целата територија на ски-центарот се поставени јасни забранувачки табли, кои мора да се почитуваат, и најавуваат дека сите идентични случаи ќе бидат документирани и објавувани на нивната веб-страница и официјалните социјални мрежи, со фотографија, име и презиме на сторителите.
Воедно, се подвлекува дека движењето со мотори, ATV или други моторни возила по скијачките патеки е строго забрането.
Од ски-центарот упатуваат благодарност до посетителите за разбирањето и почитувањето на правилата.
