Арсовски бара извинување: СДСМ ги манипулира граѓаните, немам никаква врска со сопствениците на фирмата „Дигитал оне“
Екс портпаролот на ВМРО-ДПМНЕ, Димче Арсовски денеска ги отфрли обвинувањата на опозициската СДСМ за негова поврзаност со фирмата „Дигитал оне“.
Тој на својот Фејсбук профил напиша дека не е во роднинска врска и не ги познава сопствениците на оваа компанија.
„За да биде детално јасно, ниту го познавам човекот кој е сопственик на фирмата, ниту сум го сретнал, ниту знам како изгледа, ниту ми е роднина по било која основа. Единствено што е исто е презимето. Немам никаква врска со никаков тендер, ниту пак сум имал било каква врска со државни тендери“, напиша Арсовски.
Тој обвини за манипулации и побара јавно извинување од СДСМ.
„Иако во прашална форма, моето име и презиме беше споменато на пресот на СДСМ, тенденциозно со намера да ме вовлечат во нивни креатури и да ги манипулираат граѓаните и јавноста, па затоа јавно барам извинување од СДСМ, ако им остана малце достоинство. За разлика од нив, секој мој прес каде што било изнесено било што како информација, било точно и потврдено, а не како нивниве лаги и измислици. Знам дека сеуште ги боли што ја изнесував секојдневно вистината за нивниот криминал. Избори и доверба кај народот не се добиваат со тоа што ќе измислувате непостоечки случаеви и интриги за луѓе од ВМРО-ДПМНЕ, туку со напорна работа, реформи и програма“, додава Арсовски.
