УМОРНИ СТЕ, ИМАТЕ ГОРЧЛИВО ИСКУСТВО, НО ИМА МОМЕНТУМ ВО ЕУ Билaтералните сопки за Македонија не може да одат во недоглед
„Македонија има горчливо искуство со ставањето на билатералните прашања во процесот на евроинтеграција. Вие со децении се подготвувате за процесот на пристапување и сте уморни од овие процеси, но сега во Европската Унија има моментум за проширување којшто треба да се искористи, во исто време продолжувајќи со примена на реформите. Процесот на пристапување сега го загрозуваат билатерални прашања кои се вклучени во проширувањето и сметам дека поради начинот на гласање во ЕУ ова навистина претставува голем проблем за некои држави вклучувајќи ја и вашата, и може да продолжи да биде проблем доколу начинот на донесување одлуки не се промени во иднина“.
Вака вели во разговор за МИА, директорот на Словачката асоцијација за надворешна политика од Братислава, Томаш Стражај.
Во однос на се погласните предлози за членство на земјите-кандидатки во ЕУ, но без целосни права на донесување одлуки, како и без право на вето, со цел да се забрза процесот на проширување и дали ова е реално, Стражај вели дека целосно го поддржува процесот на етапна или постепена интеграција.
– Не можам да предвидам дали овој предлог ќе биде реален или не, но сметам дека моментумот е тука, дури и внатре во ЕУ се споменуваат и конкретни датуми за можно следно проширување. Но ,од друга страна, подготвеноста на одделни земји од Западен Балкан, е исто така многу важно, за тоа како тие ја завршуваат својата домашна задача.
Според него, можеби треба да се види и дали македонските власти го одбрале вистинскиот пристап во решавањето на ова прашање. Тој смета дека можеби властите во Скопје треба да ѝ пристапат со јасно барање на Бугарија со цел да се реши оваа ситуација еднаш засекогаш.
Тој истакнува дека неодамнешната официјална посета на словачкиот претседател на земјава Петер Пелегрини е сигнал дека Македонија е сметана за многу добро подготвена земја-кандидат за идно членство во ЕУ и дека Словачка ќе ја поддржи заедно со останатите кандидатки.
.
