Арсовска со жестоки обвинувања: Наместо да се гонат криминалците, вие се одмаздувате на жена која алармира за опасност
Градоначалничката на Скопје, Данела Арсовска, преку видео на официјален профил упати остра критика до институциите, обвинувајќи ги за политичка одмазда и заштита на, како што ги нарекува, „криминалците во Владата“. Таа реагира на, како што наведува, одмаздата врз раководителката на сектор, Ивана, која вчера објаснуваше со податоци за опасностите од нелегалната градба.
„Нели ви е срам да се однесувате како државата да е ваша? Наместо да ги гоните Висар Ганиу и Изет Меџити за 150 дивоградби и милионски криминал, вие се одмаздувате на жена што само ја кажа вистината“, напиша Арсовска.
Според неа, граѓаните се директно загрозени од објекти кои, како што тврди, се градат нелегално и се продаваат како безбедни станови. Арсовска предупредува дека овие објекти можат да станат „комори на смрт“, и вели дека зад нив стојат политички фигури што уживаат заштита.
„Не смеете да чепнете таму каде што е вистинскиот криминал, па се силите на жени. Срам да ви е“, завршува таа, посочувајќи дека правдата не се спроведува, туку се користи како алатка за политички притисоци и заштита на одредени структури.
